مَكنوش 7
أنتي لوحدك
عارفة عددهم ،
ومحدش فيهم
شاف التاني،
مَكنوش أقزام
لكن عينك
مش بتشوف الحلم كويّس
مش بتشوفني
أميـــــــــــر
ولا شافت حتّى حصاني .
بالنسبالك
أنا واحد منهم
بس الفرق
إنى لوحدي
شُفت الكُل وعارف
سر بياض التلج ،
و ان الغابة ف الحواديت
مجرد خوف ،
والجنيـــــــّة
كدبة كبيرة من تأليفك
علشان تتداري فـ وسطيهم .
عارف سرّك
عشقك
لهواية جمع الأقزام
لمّا تقولي بحبَّك
ومحدش فيهم
عارف مين ؟
التفاحة
هى غرورك
لو كلتيها
مش حتقومي..
غير على إيدي.
أنا آسف جداً
الفيلم بتاعك
طـــــــــــوّل
و انا مطلوب
فـ الحواديت التانية