عاجل
قصيدة الغرقانه الشاعر السكندرى / ايهاب الشاعر

قصيدة الغرقانه الشاعر السكندرى / ايهاب الشاعر

الغسيل عمال ينقط

والتكاتك رايحه جايه

والعيال فوق السطوح

بتطير الدبور

وانا مرمي ف البلكونه

من بعد العشا

عمال أزق ف بكره بدراعي

والعب بصبعي

فى خرم شيش مكسور

خايف أشد الفيشه أتكهرب

خايف اصرخ

يقطعولي النور

نص القصايد فى الأجنده

إتحولت لأغاني تافهه

والباقي قطع بعضه

لما شافني باموت

وبخش على سوق الغلابه

بصدر مش مفتوح

معرفش دي غربة وطن!!!!!

واللا دي غربة روح!!!!!!

وبعيش مابين الصدمه

والموت المفاجئ

مع إني عاشق

للأغاني الحلوه

وصحابي القدام

خايف أموت يبهدلني المغسل

خايف أرفرف ف السما

يصطادني صياد اليمام

مبقاش فيه عندي حلول وسط

لكل أزمنة العبط

غير حل واحد

إن يجي الواد وأدلدله السَبت

ويحطلي حتة حشيش

ألفها سجارتين

أو أشدها ف حجرين

أو أعمل الغرقانه واتكيف وأنام

اضف رد

لن يتم نشر البريد الإلكتروني . الحقول المطلوبة مشار لها بـ *

*

إلى الأعلى