اقول لك حاجه؟؟
مش لاعب عشان انتي سرقتي الدور
وقلتي الاوف سايد كورنر
وقلتي نغير المواعيد
وقلتي (أيوة) للدستور
عشان انتي اللي بترصي النجوم بالليل
فمعرفش العدد مظبوط
وكل ما اعد ..
اتلخبط كأنك قاصده قلبي يدور في افلاكك ..
بتعتبريني نص قيراط في املاكك
وانا اللي مقسم التركة
وانا المركز وانا المأمور
.. ’’’’’’’’’’’’’’’’’’’’’’’’’’’’’’’’’’’’
أقول لك حاجه عن حبك؟؟
مالوش معنى
مالوش اول ولا له حدود
عدم .. ووجود جنان..
وبرود اقول لك؟؟
حبك الفاضل
من انتصارات صلاح الدين على ريتشارد
وحبك آخر الدنيا
ويجوز أبعد
ولون الطين
على صدري من المشاوير..
حصان ابيض
وقع ف كتاب قصص اطفال
ربطتي لجامه في الصفحة
ماعادش يطير ..
وحبك جزء من ثورة
ومن مكسب ومن نكسة
ومن تحرير ..
ومن اخوان وسلفيين
وعلماني وليبرالي
ومن كشمير
أقول لك؟؟
اقفلي الصفحة وضميني
وسيبي الأرض والعتمة
وسيبي الثورة والدستور
عشان عايز .. أموت فيكي
وانا نفسي أموت مستور