وهاخاف من إيه ..؟ أو اخاف علي إيه ..؟

ما الدنيا ف سكة بكره هتمشي هتمشي

والطير الناوي يهاجر هيمد خيوطه

لآخر شوفي العريان

وسواء إن طلت مداي ما كعبلنيش

فانا هاقدر اعيش واتمدد فوق الصخر بعيد

يحكي لي النورس عن حكايات بتموت

وحاجات بتعيش عن عمري وعمره وموج البحر

وسفر الناس

يسألني كتير البحر بيطرد ميته ليه ..؟

والموج الواخد سفر الناس ليه مش بيعود ..؟

ويرجع تاني الطير والناس

ويطلع مني الشمس الناميه لحد الموت

ما بقاش صياده يهمه يعود أو ليه ما يجيش

وانا كل محيطي براح البحر وريحة الملح

وقلبي العايش فيّ يسلم بالحكايات

ولا جاش علي بالي أسأل نفسي

ليه الميه ف بحر حياتنا دايماً رايحه وما بترجعش

مع إني يوماتي قصادي شايفها واخده ملامحي

وعمري معاها لبعد الشوف طب اخاف من إيه ..؟

أو اخاف علي إيه ..؟

ما دام القمر الجاي هيعيش

هيغسل وشه ف وش الدنيا

يسلم لينا آخر لحظه ف بكره الجاي

ويجيب لي النورس

يمكن يرجع تاني معاه الطير والموج

وياخدني النفس الطالع مني لحد البحر

أتبسم ليه لجل تخش معاه الشمس قلوب الناس .