للشاعر/عمر التركي
بتحلم بفارس
ما بعد الطوفان
يكون لك حياة
يكون لك سَكَن
يغيَّر عشانك خريطة الزمن
ويركب سفينته
ويفتح بجيشه الاف الجُزُر
ويصنع عشانك كواكب
ويصنع عشانك قَمَر …
يكون لك وجود
يشق الربيع ف أرضك ورود
ويطرح وطن
**
بتحلم بفارس
يكون لك مُخلِّص
يدارى هزيمتك
ويمحى خطيئتك
ويحيى مَوَاتك
أنا مِش مَسيح
**
بتحلم بفارس ..
ما كل الصبايا بتحلم بفارس
وكل الخيول
وكل المزارع بتحلم بفارس
وكل السهول
و حتَّى الطاحونة بتحلم بفارس
يطيِّب جراحها
ويمسح بإيده غبار السنين
**
بتحلم بفارس ..
أنا مِش مَسيح
أنا مَحض شاعر ببيع الكلام …
ومين يشتريه ؟!
رَميت السلاح
وحلمى يدوبك …
يدوبك … أعيش
حصانى هزيل
وجسمى نحيل
بعانى الهزيمة
وسيفى بينزف
ولسَّة المعارك أوانها مَجاش
كأنِّى مَفيش
**
بتحلم بفارس يكون لك فداء
ويرضخ لكبرَك
يخوض المعارك
ويهتف بإسمك
ينول الشهادة
ف سبيلك يموت …
**
خُلاصة الكلام
أنا مِش هموت …
أنا مش هكون لك

ف يوم دون كيشوت