الشاعر الكبير/ محمد على الدنقلي (ليبيا)

الوطن .. كلمه دافيه ..

إن كانّي رددتها .. نطمان

الوطن نغمه صافيه ..

إن كانّي غنّيتها .. نحس بأمان

الوطن سهل .. نسكنه ويسكنّي

الوطن أهل .. إن غبت ينشد عنّي

وحب الوطن معني كبير ..

ماهو كلام لسان

حب الوطن .. حب الوطن إيمان

****

الوطن .. أيش هُوَّ الوطن

ولو تدورّه في وين تلقاه ؟؟

تلقاه .. صحرا ، ,بحر ، وشمس .. مرسومات في تجاعيد خدّي

تلقاه .. عزّه ، وفخر . و ود ..

في هالخطوط في يدّي

في عروق منطفحات

وارثهن على جدّي .

الوطن .. بنت و ولد

في عيونهم قنديل ..

يضوي ظلام الليل

وفي صوتهم غنّاوه ..

هو يقول : يا وداده ..

وهي تقوله : يا ودّي

الوطن .. في الإنسان

اللي يود في الجيران ..

واللي في الصلاه يأدّي

الوطن .. في الوديان

هللي حَمَتْ فرسان ..

وقت الجهاد زمان ..

والحال متردي .

 

الوطن .. في الغيطان ..

اللي مخضّبه قمح ، وشعير

في زهرة القرعون ،

والنخل والزيتون

في العصف ، والريحان ..

والخوخ ، والرمان

وفي نحَلْ نشوان ..

بِزْعَتَر متغدّي ..

في شقوق رِجِلْ رقَّاي النخل

في قطرة عرق فلاح ..

بين الشجر يا جاي ، يا معدّي

في حنجرة بحّار ..

متوكل علي مولاه ..

محتضن مجاف …

وهايم مع مغناه ..

(ياريح هدّي)

في هالعبا الحمرا ،

وهالجرد جرد الصوف ..

والمرقوم لمسدّي

في هالرغيف السمح ..

اللي امحمّره تنّور ..

ومنته أرضي

من عاجنه .. من خابزه .. ؟

أم العيون الحور …

اللي صاينه من غير حتى تقول ..

في جاشها ودّي

 

الوطن .. أرض

الوطن عِرض .. لكن بفارس ..

ويبّي معاه مليون فارس

وصيفة الفارس ..

كيف شهر مارس

فيه الدفاء ،

وفيه الحمام . طْوير السلام ،

وفيه النوارس

وحتى السلام يريد حارس ..

يحب الوطن كيف الله واحد

والحب واحد .

والوطن واحد .

والله واحد

وحب الوطن إيمان

علّميني نبتسملك عن بُعد .. وتحسّي بيها ..

ولمّا نحتاج لمحبه .. بشكل ثاني ..

تسبقي لهفة فؤادي .. زي كأنك تأمريها ..

ولو أنا أخترت .. انتغزّل بأنثى غيرك ..

تحضري ، وتجسّديها ..

نفس ريحة صُبح عطرك ..

نفس هالغيرة العجيبة ..

نفس شكك ، أو ظنونك ..

نفس .. أيش نسيت ثاني .. ؟

نفس تهميدة عيونك ..

موش قتلك مرة فاتت ..

(لو تكرّمتي احجبيها ..

وحطّي نظاره عليها ..؟

لجل هي فيها حكاية ..

ما نبيش نخوض فيها)

واخطري مليون خطرة ..

وكل خطرة .. خليني مشتاق ليها ..

ــ ( يا .. حَـبيـْـ ..؟

ــ أيش قلتي ..

ــ يااااه) زيدي عاوديها ..

ردديها بصوت أمي ..

أو بلادي .. اللّي الغلا لايق عليها ..

وحُبّها حاجة غريبة .. كيفما هي . باللّي فيها ..

وأنتي يَلْعَنْ .. آه منّك .. عيبك إنك تشبهيها ..

كنت بنقول انتي (…)  بس بلاها .. فوّتيها ..

انتي فتنه بالبديهه ..

نذكر اسمك .. تمتسح كل الأسامي ..

اللي فـ حياتي سمعت بيها ..

فيك حاجه ، ناقصتلي .. وفيّا حاجه ، تكمّليها ..

زي دموع الشوق .. غيمه ..

ما تبيها ، وتسكبيها ..

زي أنا من غيرك أنتي .. زي أنتي غيري أنا ..

زي موسيقى الصمت .. ديما ..

آه بلاها ، وآه بيها ..

طرقعي بروس الأصابع .. والخواطر راقصيها ..

الرقص لغة الهوى .. والهوى فتّان تيهه ..

يعني لُعْبَه .. لو بغيتي ألعبيها

والوصال أرواح عطشى ..

والبُعد كذبه كبيرة .. بس صعب تْصَدّقِيها ..

وصعب صعب .. تْكَذّبيها ..

نبتسملك عن بُعد .. وتحسّي بيها ..

      ***