13735458_10205466578178714_1036076205_n

 

و ما أبرئ نفسي ..

فٱن النفس أمارة

ومش عايز انا الدنيا..

لأن الدنيا دوارة

ولما طال مطال الليل..

لقيت الشمس نوارة

انا راضي بقليل حالي

و خالي القلب والخلان

قاسيت من بئس أفعالي

ولابس برقع الخجلان

ابان اوقات جبان ساذج

وانا جوايا تور هايج

و طور هادى

و دور تالت

بيشهد زور

و ضلمه و نور

ولون باهت بفعل كلور

و غنوة فلكلور حلبي

حياتي كتاب ..

و كح تراب

علي رفوف المشاع _قلبي_

و داب اتساب ..

بدون اسباب

ونايم ع الرصيف جنبي ..

و متحمل

و متأمل

ومتزمل بتوب ايوب

وراضي باللي متقدر

مسلم  باللي كان مكتوب

ما حد يقولي أيه ذنبي

 ليلاتي انا ليه ابات مغلوب

 ليه لون الدنيا مش بمبي

و قطف الحلم كان معطوب

يارب الطوبه دى تجَلي.. و متصيبشي قلوب و قلوب

و رُب التوبه دى تحلي .. و متسيبشي اثر لذنوب