فضفضه
**********
وانكسر حرفي اللي كان
ساند سواعد كلمتي
لحظة ما هان قلمي البريئ
ع الصولجان
ف ديوان بلاط المملكه
قلمي اللي عاش
يمسح دموع نن العيون
ويكون أنيس المظلومين
ف سجون بتعشق وحدتي
لحظة هوان
حرفي اللي واقف يرتعش
قدام لهيب المحرقه
وحبال دواير مشنقه
متعلقه فيها الرقاب
من غير حساب
فوق الغلاف اللي اترسم
من دم سال فوق جتتي
وأنا لسه واقف ف المدى
باانسج حروف الفضفضه
من معطيات اللي انكتب
لحظة شغب
فوق الصور ف الألبومات
من لقطه هِربت
من مذيع عبر الشاشات
من صوت بنات
واقفه تملي بتستغيث
من ظلم أسراب الجراد
باانسج حروف الفضفضه
من دمعتين
متنطورين علي جثتين
فوق الرصيف
من نظره الطفل
اللي واقف يرتعش
من منظر الرعب المخيف
وانا لسه واقف ف الفضا
بااترجي صوت الفضفضه
والعين بتترجي الجبان
يرحم زماني اللي ابتدى
ينزف وجع
يرحم ديواني اللي اشتكي
كتر البدع
يرحم كلامي ع الورق
ويرد حلمي اللي انسرق
حلمي اللي كان
بر الأمان ..نور سكتي
ولكنه سادد للودان
ومناه يشوف لون دمعتي
فوق الخددود المجروحين
والدبلانين من حسرتي
علي حرف مات
فوق السطور ف الكراسات
كان حلمه يكتب من سُكات
لو كلمتين يبقوا الدوا
للي هوى
يقرا اللي كان كتبه القلم
فوق الورق
أوحتي يمشي ف سكتي

************************