نعى المرحوم
محفور على شجره
بكلام يتحس ومش مفهوم
بعد اما لعبنا ..
ودوخت عليكى .. وشيلت غمايا
إتصور سيلفى معايا
واتغنى بكل غنايا
واتمدد تحت الشجره ومات
بعد اما لمحنى يادوب لفيت وظهر له ..
عرض قفايا
نعى المرحوم
صفحات مكتوبه بحبر الوهم
ومعاه الصوره على الشجره من غير السهم
مرسوم وياه ..
وف نفس مداه
عصفور مهزوم
معدوم الفهم
بيغنى ف وقت ما صوته يضيع
وبيبقى وديع .. مع كل وضيع
والتلج يشوفه شموس وربيع
الصبح يقوم فرحان يجرى
بهدوم النوم
يصطاد فراشات
ويعبى الضحكه ف أبريق الحلم المخروم .
أنا كنت باخدر قلبى كتير
يفرح وينام
وباصون عيش الذكرى المره ..
وملح الأيام
فى طابور عشقاك كنت أخير
وف أحزانك دايما قدام
لا ارجع ولا ادور
فارس مسحور
بيشوف صبار الصحرا زهور
ويرش بخور
على جمر خيانتك .. يتدارى العفن المبدور
أنا مش باتبرأ من ذنبك
أنا مش معصوم
كل الموضوع كلمه اتكتبت على بيت مهدوم
قلبك جواه
البرد ملاه
ولا بيدفيه .. كدب .. ولاهدوم .