لا انا من أولياء الله
و لا مجذوب
دُعايا لو دعيت يشرخ
سبع سموات
ولا عايش ولا محسوب
على الأموات
لا انا عابد و لا صوفي
ولا بتبرّى من خوفي
ولا كان عندي غالي وراح
بلاد الله لخلق الله

لا انا فارس من الأساطير
حصاني في الفضا بيطير
ولا عطّار
معايا بلسم الأوجاع
ولا عرّاف
أرجع حلم في الخوف ضاع
أنا شاعر
جراحي زي أي جراح
أنا خايف و مش شايف
و بدعي الواحد الفتاح
يا اعيش آدم
في جنة روحك التفاح
يا في عنيكي أموت و ارتاح !