أنا وهو بقالنا سنين ماتتعدش

كده اصحاب

ومهما عني يتأخر

بقول راجع ولسه احباب

لاغاب عني غياب موصول

ولا في وشه قفلت الباب

وعمره ماساب في يوم عنوان

يغيب مايغيب

بيرجع لي صديق صادق

وناخد بعض بالأحضان

ساعات ييجي وانا بفطر

وبيجيني وانا صايم

كتير جاني وانا نايم.وصحاني

قضينا السهرة في الصالة

شربنا مج شاي واحد

وخمسناه مع سيجارة

قرينا ييجي ألف ديوان

رسمنا بالحروف ألوان

مَلينا الحيطة بكتابه

وكنا كتير بنتخانق

وعمره عليا مااتغابا

عرفنا كتير بشر اجناس

ومنهم ناس صريحة لحد ما تصدق

بان الكدب مش موجود

وفيهم ناس يبان الكدب في عيونهم

مالهوش حدود

وكان الشعر ياسادة

تمامه في صحبتي برنجي لمحني

وهو في الاتوبيس ناداني

وقال يامخزنجي رماني

في بحر عين البت و

نط وسابني وحدي غريق

وقال لي اكتب ..

كتبت بريء

بكل عيون كانت قابلك

خدتني فــ يوم علي سهوه

قعدنا فـــ ليلة ع القهوة

طلب شيشة وشاي بحليب

وقام حاسب علي المشاريب

وسابني في قلب قلب الناس

وقال لي اكتب باحساسك

وحلفني ووصاني

حذاري في يوم تبيع ناسك