رسالة من طفل فلسطينى

رسالة من طفل فلسطيني .. شعر عامية

بقلم  / أحمد عواد

اقرأ أيضًا : أحمد عواد يكتب : من يواجه الفساد

[ads1]

قصيدة رسالة من طفل فلسطيني ..

طبعا أطفال

وبحلم عجينه من الصلصال

من يوم ما وعيت

وانا بلعب على زفة ديناميت

فعرفت ان اللعب بقى محال

نسونى طفولتي

مع الجنرال

أخدوا الزمامير

وعروستى الطين

وسابولى خيالى

ما بين طوبتين

العب مع مين

مرجيحتى الخشب المكسورة

بتضم عيونى المبلوله

وبتطلع فوق

لجنينة بيتنا المدفونه

تحت الأنقاض

انا بحضن طوبتى وكراستى

والحلم المدفون

فى عروستى

وأجرى على البيت

تشكيلى حيطانه إللى اتهدت

تحت الديناميت

آخر غاره

كسرت فوانيس كل الحاره

سقفوا يا ولاد الطياره

حدفت الغام

على برج حمام

وقالولنا حرام

لو طوبه فى يوم حدفت مدفع

سقفوا يا ولاد

فين افراحنا

دا البطل العبرى بيدبحنا

ياحلاوه نموت

طلقته بتفوت

من طفل لطفل

وكله سكوت

هى الافراح محتاجه لصوت ؟؟؟؟؟

سقفوا يا ولاد

مات الدره

بين حضن ابوه

وكأن رصاص الموت خلوه

ضحك ومراجيح

ويقلب صريح

كل الساكتين دول مش خاينين

لأ..متفقين

دا القدس العربى المحتله

لها صوت بيصيح

ووفاء إدريس سمعت صوتها

من بعد سناء

ودارين وايات

حكايات

بتقول

ان الدره لو مات مره

حيعيش فى ضمير مليون امه

بعد التصحيح

 

من ديوان
اسرار الطباشير