كتب / محمد مشرف

من ضمن أكتر البوستات المستفزة اللي بقابلها تقريبا عند كل الناس,
هو اللي ينشر حاجة سلبيه في مصر ويقولك “اللهم هجره”, بحس فيها بغباء

هو مبدئيًا ليه الموضوع ده انتشر في الفتره الاخيره؟!

سبب انتشاره هو الناس التافهه اللي زحفت على بطنها علشان تسافر أو اتجوزت واحدة اجنبيه بعتها حظها السيء في طريقه وسافر على قفاها, وتلاقيه شغال هناك عامل أو موظف في شغلانة هو بيعتبرها في مصر “وضيعه” وبيكسب يادوب فلوس تكفيه ياكل ويشرب ويسكن (ده إن ماكانش ساكن على قفا مراته) وممكن كل كام شهر كده يجيب ليه طقم هدوم ولا حاجة.

ييجي بقي نفس الأخ ده بعد لما يسافر, و يقلب الفيسبوك عنده لبوستات من نوعيه “احنا عندنا في كذا” ويكتب اسم الدولة. هتلاقي بوستات اسمها “احنا عندنا في المانيا” وبوستات تانية “احنا عندنا في امريكا”, وهتلاقي كندا, وهتلاقي الامارات وغيرهم. المشترك مابين كل الحاجات ديه هو إزاي الحياة هناك جنه الله على الأرض وإزاي في مصر كانت جحيم وإزاي مفيش مقارنة أصلا.

هتلاقي بوستات عن البوليس اللي هناك اللي بيخليك نايم في الشارع وييجي يحرسك, هتلاقي بوستات عن الدكتور اللي قابلك صدفه في الشارع واتخض من لون حواجبك واصر انه ياخدك عنده المستشفي علشان ينقذك من البواسير اللي كانت هتهجم عليك فجأة وتهدد حياتك. هتلاقي البوست عن إزاي لما قدم على رخصة السواقة الموضوع كله خلص وكانت الرخصة في جيبه في اقل من 19 ثانية. وهتلاقي هرتله من ديه كتير.

بعد كده الشباب في مصر يشوفوا الكلام ده, يعملوا شير, ومتابعين الأخ يزيدوا, وكميه الناس الناقمه على حياتها تزيد, وكله بيقولك “اللهم هجره” وخلاص على كده. ماحدش بيشتغل ولا حد بيعمل أي مصيبه في مصر والمفروض إن البلد تبقي أحسن لوحدها.

خليني كده بقي اهد شوية الأحلام الخيالية  علشان نخلص من الاسطوانة المشروخة دى اللي بنشوفها كل شوية ديه:-

1- مفيش أي دولة بره مصر ولو جزر القمر هتاخدك وتديلك أي وظيفه ليها أي لازمة (يعني تكون مش مرمطون) الا لو أنت مميز فلي بتعمله. مبدأ إنك فشلت أصلا إنك تلاقي وظيفه في مصر, ده معناه إنك عمرك ما هتلاقي حاجة ليها لازمة هناك ولا هتعرف تسافر أصلا (الا لو اتجوزت وعشت على قفا المدام)

2- الحياة بره مصر مش ورديه بالمره. هتتعب وهتشتغل زي الحمار ومش كده وبس, ولازم تبدع في شغلك كمان. ولو في يوم ابداعك قل, هتلاقي نفسك في الشارع.

3- في اوروبا الناس مش عايشة في قصور. يعني حلم إنك تروح هناك ويكون عندك بيت بجنينة ده تنساه تماما!! متوسط حجم الشقق في مدينة زي باريس (اللي هي حلم حياة الشباب كلها) بيبقي في حدود 30-40 متر مربع وبيبدأ من 9 متر مربع. الشقة اللي حجمها مابين 30 اللي 40 متر مربع ديه, هتاخد على الاقل ثلث دخلك الشهري ايجار ليها.

4- المرتبات في اوروبا مش خيالية ولا هتخليك تجيب عربيه كل كام شهر ولا الأفلام اللي أنت مقتنع بيها ديه. متوسط المرتبات في المانيا لمهندسين البرمجه مثلا (وظيفة من اعلي الوظائف دخلا في العالم كله) للشخص اللي عنده خبره في حدود 1-2 سنين, هو حوالي 47,500 يورو في السنه. بعد الضرائب بيفضل معاك في حدود 28,500 يورو في السنه. يعني في حدود 2375 يورو في الشهر. هتدفع منهم ايجار بس لشقه اوضه وصاله في حدود 750 يورو. يعني التلت. البقي يادوب يكفيك تعيش بشكل متوسط طول الشهر. بالمناسبة, متوسط الدخْل العام بعد الضرائب في مدينه زي فرانكفورت في حدود 2400 يورو في الشهر.

5- البوليس في العالم كله مش قمور ولذيذ. في بريطانيا لسة بنت محبوسة 3.5 سنين علشان قالت شويه كلام مؤيد لداعش على تويتر. في فرنسا الراجل اللي زي باسم يوسف عندهم دخْل السجن علشان اتريق على حادثة شارلي. امريكا بقي مش محتاجة كلام أصلا. ممكن تنضرب بالرصاص في الشارع لمجرد إن الضابط مزاج أمه كده وكان “خايف على حياته” منك. كفاية أصلا حاجة زي ال patriot act اللي تهد كلمه حريه من بابها (المفروض انه كان خلص السنة ديه بس لسة فيه بنود كتير فيه مفعله)

6- صدقني الواسطة والمحسوبيه موجودة في أي مكان في العالم من شرق الأرض لغربها. ليها اسماء كتير هناك اشهرها “networking” وببساطة لو أنت ليك معارف في أي مكان, سهل تاخد مكان واحد تاني أحسن منك. كل اللي أنت محتاجه بس إنك تكون بتعرف تعمل الشغلانة لكن مش محتاج تكون أحسن واحد فيها!

7- البيروقراطيه موجودة في كل مكان. كفاية جدا إنك علشان تطلع فيزا لاي دولة من دول, بينطلب منك حساب في البنك يكون فيه مبلغ محترم. أنت عارف وهم عارفين والدنيا كلها عارفة إنها مش فلوسك ولا أنت عمرك كنت هتعرف تجيب ربعها والا مكنتش جربت تعمل فيزا 20 مرة وكل مرة تترفض!

طب الناس اللي بتسافر وفعلا بيبقي معاها فلوس وسعيدة, دول مش موجودين؟!

لأ دول موجودين, بس الناس ديه كانت ناجحة في بلدها قبل ما تسافر. كانت مميزه في مجالها مهما كان المجال ده وعلشان كده كانت العروض بتنهال عليها من كل حته وهي اللي تقرر تسافر أصلا ولا لأ ولو سافرت تسافر فين. إنما إنت يا باظبوظ الليل الحزين, يلي دخلت كليه حقوق ولا تجارة اقاليم علشان مجموعك كان مش جايب همه وفضلت فيها 7 ولا 8 سنين بتسقط, وبتتكلم عربي وشويه انجليزي من بتاع “I am donkey” هاتروح المانيا ولا انجلترا ولا امريكا تهبب إيه؟!

ولما بتفشل تجيب الفيزا وتقوم رايح بايع اللي ورا اهلك وقدامهم وتستلف من طوب الأرض علشان تجمع 50 ولا 60 ألف جنيه تديهم لحد يهربك بيهم بشكل غير شرعي لايطاليا ولا اليونان. متوقع لما توصل هناك إيه اللي يحصل؟! إن العمده يستقبلك بنفسه في الشارع ويديلك مفتاح المدينه؟!

يعني طالما مستعد تشتغل مرمطون وتتعامل زي الكلب وتعيش بلقمتك وتضيع 50 ولا 60 ألف جنيه فوق كل ده, طب ما تعيش مرمطون جنب أمك وابوك وتصرف ال 50 ولا 60 ألف جنيه دول في أي مشروع ولو مقدم ميكروباص أو عربيه أكل أو حتي توكتوك. أهو على الاقل لو فشلت في بلدك, عندك حضن أمك وابوك ترجع ليهم إنما هناك هايدولك بالجزمه وماحدش هيرحمك!!

بجد كميه الغباوة اللي في الشباب اليومين دول غير طبيعيه ولا منطقيه!!

تحديث: بالمناسبة إن فيه تعليقات عجيبة من ناس بتتكلم على إنها سافرت دولة أو اتنين وإن الكلام ده “غلط” وكده, أنا سافرت لحد دلوقتي حوالي 22 دولة بالضبط. عشت في حوالي 8 دول اقل واحدة فيهم كانت سنة. الدول ديه متوزعه على قارات العالم كلها, يعني اقدر اقول إني لفيته من شرقه لغربه ده غير إن بيجيلي عروض عمل من دول تانية أكتر من اللي رحتها والعروض ديه بعرف منها متوسط المرتبات الفعلي, الضرائب, التأمينات, وكل حاجة. يعني أنا مش قاعد على المصطبه في مصر وبالف كلام وخلاص.

تحديث تاني: أظن كلامي واضح انه على الشاب اللي لا يملك تميز في أي مجال من أي نوع وعايز يسافر. لا اتكلمت على مهندسين ولا اطباء ولا محاسبين ولا أي حاجة من ديه. كلامي واضح. اللي فشل انه يلاقي أي وظيفه في مصر وفضل زي الشحط بياخد مصروفه من بابي ومامي, مش هيلاقي رئيس الاتحاد الاوروبي مستنيه في المطار علشان يديله وظيفه نائب مدير البنك المركزي الاوروبي. الموضوع بسيط. أنت متميز في أي نيلة من أي نوع؟ عرفت تعمل نجاح ولو بسيط في مصر؟ لو الإجابة آه, يبقي نسبه إنك تنجح بره كبيرة. لو الإجابة لأ, يبقي انتيل على عين امك بلا وكسة سودة!