كتب / محمد السيد ابراهيم
كتاب موسوعة الشعر العامي في مصر تأليف الناقد د : يسري العزب ، جاء فيه :” إن أبحاثي في هذه الدراسة، هي عصارة عمر من البحث والمتابعة والتنقيب والكشف والتشجيع، في أهم ظواهر الشعر العربي المعاصر في مصر، ألا وهي ظاهرة الشعر العامي : الذي حمل هموم الوطن وقضاياه وآماله، معبرًا عنها في تشكيل جمالي متنوع ومتفرد” .. وعندما أقدم لكم ، هذا الشاعر الذي أتنبَّأ له بمستقبلٍ باهر ، أعتبر نفسي أعرفكم إلى جوهرة من مجوهرات شعر العامية ، الشاعر المتميز / عمرو زيتون، لذا أترك المجال كي تتعرفوا إلى هذا الشاعر المبدع ، دعواتي له بالتوفيق .. له ولكم عظيم شكري وتقديري .
آخر مكالمة
………
حبيب قلبي صباحك فل
صباح الورد ياحبيبتي
وكان نفسي عيوني تطل
ف نني عنيكي دلوقتي
أنا موجودة وف قلبك أكيد حاسس
م انا قلبك
وانا شوقك
وانا أرضك
وعرضي وفرضي
واتمنى في أقرب وقت نتجمع
وانا قصادك بتوه مني
ياساكنة القلب والنني
وانا وياك حبيب عمري
بحس البعد جنني
بمعنى؟
إن أنا دايمًا بخاف م الجاي طمني
وليه بتخافي ياحبيبتي
مكانك فين وانا اجيلك
خلاص خلَّصت تسريحتي
يلاش خليك !
أنا شايفاك وكل مشاعري دي ملكك
حبيبتي بجد أنا اتوترت!
حاجات مش لاقي تفسيرها
ياحب العمر اقول لك إيه؟
أنا حاسة إن أنا تايهه
وتوهتي بس تتلخص
فِ إن حبيبي مش جنبي
أبوس إيدك
أنا إيدي ابتدت ترعش
وعقلي وقلبي متوغوش
عليكي حقيقي فين انتي؟
أنا ف أول مكان شوفتك
وحيدة وقلبي متكلبش
كفاية انك بتتكلم
وبسمع صوتك الهادي!
أنا إحساسي مش عادي
بتسبق كل كلمة دموع
وراكب جنبي في المشروع
وشوش الناس بتتغير
عليها علامة استفهام !!
أنا حاسة بإن الموت
قريب مني وزيادة
ف وحياتك تعلي الصوت
دة خوفي ماليني كالعادة
تخافي ازاي وانا معاكي
عيونك فيها عنواني
بنادي عليكي سامعاني؟
في صوت جنبك ضرب جامد
وبنده لك مابترديش !!
وعندي الشبكة مش فاصلة
أنا هنزل هنا يا اسطى
حبيبتي السكة مفتوحة
ف ردي عليا من فضلك
أنا سامع صراخ جنبك
حبيبتك مين ؟!
تعيش انت
أنا واقف ف وسط الزحمة
جنب الدم
تعالى وشوف حبيبتك مين
أنا أدامي وﻻ عشرين عروسة ياعم !!
عروستي !!
أيوة دي هي
ودي دماغها
ودي ايديها
وباقي الجسم فين هو؟!
أنا بحلم أكيد بحلم
ياعم اهدى
انا هادي
ولكن منظر اﻷشلاء
ماهوش عادي
ماهوش عادي
وسيبلي ف حضني انا دماغها
وهات ايدها دي جنب التانية
واعدلها
وسيب تليفونها جنب ودانها
لو تسمح
دي لسة السكة مفتوحة
مسيرها ترد
مسيرها ترد
…………………
2 / ياعم يا
…………..
فرحان انا
بس اللي كاسر نفسي في الفرح إنها
مش قادرة بيا ف يوم تحس
مع إني حابب قلبها
من قبلها
في قلوب كتير
حاولت تدور على قلبي أنا
مالقتش دور
وانا قلبي حاسس بيها بس
رغم انها مش قادرة تفهم
إن انا من يوم ما شوفت
جمال عينيها وحسنها
أعلنت ع الفور احتجاجي .. على البنات
علشان لقيت أجمل صفات
بتشدني
وانا كنت بحلم إني انام
واصحى على صوتها الجميل
يطربني لما أسمعه
يهمس في ودني
الحب والشوق والحنين
يعلن أميرتي الطيبة بتحبني
لكن لقيت الليل طويل
رغم ان ابوها العدل والتقوى ف سبات
متجمعين
والرحمة أحيانًا تجوز
على كل حي
وانا لسة جي
ف دنيا حب المستحيل
ليلي الطويل
جايز هيطلع ليه نهار
وانا ف انتظار في عيون الحياه
ياعم يا ….
بنتك حبيبتي المشكلة
عايشة البراءة ف سنها
عايشة المراهقة بكل لون
وبكل شكل ف شكلها
الغلب ساكن قلبها
ماقدرش يفهم قلبي انا
واقف على بابها وبخبط
وماهوش مظبط نفسه
استقبال حبيب
فاسمح لي اقول لك
كل شيء قسمة ونصيب
……………
3/ مرت ساعات
……………
مرت ساعات البعد والحرمان
سنين
هو انتي مين
علشان يعيش القلب في بعادك
حزين ؟!
باصص بشوق
على كل طلعة شمس
في ميعاد الشروق
راسم طريق مليان أمل
كان محتمل
يكمل نمو المرحلة
بالصدفة قابل مشكلة
متمثلة ف شكل الحقيقة المؤلمة
حب بصحيح
حس بحنين
طب يعمل ايه
والأرض تحت اقدامه طين ؟
مطلوب يخطي
بدون مايغرز في العجين
مر بتجارب صعبة
مش واصل لحل
ينزل في حفرة يعدي سور
بيقابله تل
محتاج يفوق
رغم انه مش شارب كحول
كل المشاعر جوة منه اتألمت
طابت دي لما الحلوة جت …
واتبسمت
بينادي آدم لجل يحكي له الظروف
إزاي اسيبها بعد لما قابلتها
آدم في عرف الناس بشر
وابو البشر
لكنه في العرف الجديد
طلع ابنها !!