شعر: مجدي فكري
ازاي بتقتلني
يا جاهل بدينك وديني
بسألك ياريت تجاوبني
ازاي أنا بحرسك بالليل
وانت في الصبح تقتلني
وازاي أنا في عز البرد بحميك
وانت بنار الغل تغتالني
انا اللي مش عدوك ..
عدوك هناك برة الحدود
وانا في النعش .. بصيت في ايدك لقيت دمي
رصاص غدرك اللي قتلني
هو نفسه اللي جارحني
وخللى السؤال محيرني
ياترى أي دين إداك الحق تقتلني
…………….
ازاي بتقتلني
وانا مديلك بالأمان ضهري
حاطط سلاحي ورا ضهري
وباشرب ف كوباية شاي تدفيني
تنسيني غربتي عن اهلي
اهلي اللي شايل صورهم في محفظتي
صورهم كلها غرقانة في دمي
صور ولادي ومراتي وامي
امي اللي كانت مستنياني
ازورها في عيد الام ..
صورتها مليانة بالدم
الدم غير ملامحها .. وصوت بكاها عويل بيدبحني
…………………………
ازاي بتقتلني
وانا اللي سبت ولادي ف الصعيد
ووقفت حارس على الحدود
ادافع عن ولادك واخدهم ف حضني
ازاي بتقتلني وانا لسة مصلي الفجر
بتقتلني وانال اللي مؤمن زيك
بالاله الواحد الاحد ..
وباصلي فرضي واصوم رمضان
وازكي زيي زيك بس دين مش دينك
ديني دين التسامح
عمره ماكان هيسمحلك تقتلني
ازاي بتقتلني وانا بأعبد الفرد الصمد
وواقف باحمي تراب البلد
بحمي عرضي وعرضك.. ولدك وولدي
رصاصك ياخاين .. بتوجهه لصدري
وسايب صدر العدو يضحك
ويملا بضحكته ارض الوطن
……………………..
ازاي بتقتلني ؟؟؟!!!!
وانا مش عدوك ولا بعت يوم قدسك
قدسك بيدنسوه بالجزم كل يوم
هم اللي دنسوه يا غبي وليه تدفعني التمن
انا مش عدوك
عدوك هناك ياغبي
عدوك احتل أقصاك .. وأقصاك من طريقه
وانا الي بادفع تمن خوفك
وادفع تمن جهلك
وانا عمري ماكنت جبان زيك
ولاخفت يوم من الموت
دايما وانا واقف بحرسك بستنى الموت
بس كنت اتمنى الموت في الميدان
انما الموت منك جالي بطعم الغدر
موت على ايد الندل الجبان
موتي على ايدك قهرني قهر
………………………… .
قتلتني .. بس الوطن هيفضل يعيش
قتلتني بس عمرك ما هتقتل حلم اللي جاي بعديا
والوطن اللي انت ما حبتهوش
هيفضل رافع تيجان النصر
وابني اللي انت ماتعرفهوش
هيفضل يرفع علم مصر
