الخوف
.. وِ خُفْنَا كتير
و مات مِنّا كتير ، م الخوف
ولا بننظق .. ولا بنسمع .. ولا بنشوف !
يا بكرة الجاي – أنا ف عرضك –
تجيني أمان !
تعالى راكب الرّهوان
تعالى فارس الفرسان
تعالى ، دق عالبيبان ..
و صحّيني ..
و خد إيدي ، و عدّيني ..
لبر الشمس و الضحكة
و خلّيني ..
أمد الخطوة عالسكة
يا بكره الجاي ، أنا عطشان ..
أنا يا بكره – صدقني – أنا إنسان ،
كرهت الدمع و الأحزان ..
و مش عايز أموت نايم على سريري
أنا عايز أموت واقف على حيلي
و عهد الله ، أنا قادر .. لكين صابر (!!)
و صبري دابت احباله ، و مش قادر ..
أغمّض عيني – يا بكره – و اموت م الخوف.
٢٣ فبراير ١٩٧١