للشاعر السكندري الكبير / خالد عاطف أبو العزم
============
نزل المطر
راجل عجوز
واهب عيونه كشافات للسكك
وقلبه شجره قطعوها دكك
لجناين العشاق
واقف وحيد
يعمل مراكب م الورق
تمشى على سطح البرك
ويغنى للركاب
عن ذكريات هربت كتير
من تحت سيف الشطب
عن السما
وهى بتصلى عشان الأرض صابها الجدب
ويفتكر لحظة ما كان
قلبه وحبيبته بيقعدوا ع العشب
فى حضن الشجر
مش لاقى دكه تمنعه
من أرض بللها المطر
كان يوم عجيب
برغم قعدتهم يوماتى
الوقت واقف
أصل ساعته الصبح باعها للساعاتى
واشترى لها ورده بيضه وعقد فل
الدنيا عتمه لا ليها روح ولا ضى
وفى المحيط حواليه ماشافشى
إلا قلبه بس حى
يسأل عنيه :
حبيبته ليه بقت النهارده بتختلف ؟
وقلبها واقع على شنطة ايديها بيرتجف
لحظة ما ايدها برعشه سابت من ايديه ؟!
لما الشجر مايشيلش غير عصفوره خايبه
والذكريات تنزل مع نقط المطر دايبه
عيونه تنعى الكشافات الغايبه
وتبقى أول كلمه فى صمت الكلام
تدخل فى مركب من مراكبه فى البرك
!! ………….وتنـــــــــــــــــــــــــــــام