قصيدة براءة شعر / على ابو المجد

روحي/ خلايق بعترتهم ريح
عيني/ صبايا ف الخلا تسرح
و انتا اللي واخد يا ندى تصريح
تلمس خدود الورد ، فـ يفتّح

ياما سقيتَك ضحكة للمجاريح
و الدمع طارح ع الرموش سُكَّر،

يا ام النهار راجع بطعم البيت
يا فرحة العمر اللي فات احزان
بارت أراضي الصبر يوم ما نسيت
أقطف ربيع الحلم .. نور و ميزان

مادد وريدي .. جدر بيكي يقوم
فارد دراعي غصن ؛ فـ ارتاحي
ليكي برأة طفل راح ف النوم
ليَّ مرارة جرح بات صاحي

تُهت ف هواكي ألف ليلة و يوم
واضح ؛ مانيش ف العشق بتنكَّر

مين شال غيطان القمح من طيني
زارع مكانهم م الحديد نخلات !
عريان يا توب الستر .. غطّيني
دي عيون كماين و الرموش حيّات

طالع نخيلك يا حياة حِنّي
ليكي انقسم سِنّي سواقي و نيل
مِنّي على قلبي يكون مِنّي
و اوعي لـَ يِبري نور عيونك ليل

راجع حمام العمر بيغني
لا تاه و لا أبيض غناه اتعكَّر