سألني صاحبي من غربه
أجيب لك ايه وانا راجع؟
لانى احترت!! في كلامك
وطلباتك ساعات بتهزني غربه
وساعات بترد لي عقلي
وافسر حلمك المرصود
٠٠٠٠وكان ردي!!
هات لي جناح كبير جدا
يرد الغايب المتغرب المدبوح
يعيد العز لأصحابه
وهات لي باب
بيفتح بس لاحبابه…
وهات لي مخده بتنيم
لافكر تجيب ولا عتابه
٠٠٠٠وكرر تاني ف سؤاله
أجيب لك ايه و أنا جاي لك ؟
٠٠٠هات لى مخدة موصوله
احط عليها راسى و انام
هات لى قلب ما يزعل
ولو يزعل بيصفى قوام
هات لى حب فارقنى
وسابني جوه حيرتي زمان
باشوفه بس في الاحلام
كمان هات ساعة راحة البال
وحبة فرح .. لو بريال
وهات لي قفل ومسوجر
اخبي فيه تلال أحزان
و هات الحب مليون حضن
و هات لى معاك شوية صبر
و هات لى للخواطر جبر
و هات صورة الذكرى
ف قلبى لسه محفورة
لكل اصحابي واحبابي
وبنت ف أولى حبيتها
ولسه صورتها ف عيوني
وهات لى أمان يكون طازه
وضحكة طالعة باطمئنان
اقول لك بس ماتخافشي
. عشان خاطري متتلخبطش ..
هات لى .. زمااااااان زماااااان خالص
يكون ألوان من التوته حدا الترعه
من الجميز ة من الرمان
وهات العمر من الأول
وهات حبايبنا من تاني
وهات العزوة واللمة
وهات ستي وهات جدي
وحضن بريحة الأفران
ف وسط المحنه والعجان
ماجور م الفرح ف دماغي
وضمه من ايدين جاره
شالتني يوم على رأسها
تفرجني على المولد
عشان ضربني ابنها مره
وصالحتني بكام بوسه
ولفت بيا وسط ميدان
وجابت لي درة مشوي
وحب عزيز وكوز رمان
بقيت اتمنى م العاصمي
يضربني كمان وكمان
وهات الجيرة والصحبة
وهات قلب مااسودش
وعين صافيه بتحرسني
ومابتحسدش قوت غيرها
جميلة عمرها صافي
مابتخافشي ولا ترمش
وعيش وملح من البقال
ما يتخانش .. ولا يتهان
مانيش بندم علي اللي فات
لكني بحن للاوقات
بحن للهنا اللي
فى الذكري وعدى و فات
وبرضو بحن واشتاق له
بحن لعمر عدى فات
بحن لكل لحظة شوق
براءه عشتها ف الحب
وعشناها مع الأحباب
عزاز الصحبه كانو لذاذ
وضحكه طالعه ببريقها
بتضحك وسط مليون قلب
و غصب ان عنّا بندور
وشوش بتحبنا لله
فهات لي منها قلب اخضر ضي
أعيش به كل عمري الجاي
وهات لي أيام كات القعدة
تلم الصحبه والاخيار
وضحكه ترج حيطه الجار
و تسمّع قهقهه من القلب ..
لا بنحسبها أي حساب
ولا بنقيسها بالسنتي
ولا نسجلها جوه كتاب
وهات لي درس ف الكتاب
ولوح اردواز اخضر
على صدرة آيات الله
حافظها وكلنا واحد
ونضحك إذا مولانا فاتنا ونام
ونضحك لو نعس أو مال
وهات لي حضن من صاحبي
قدر يحميني من الاشرار
و كل واحد فينا شمس
يمد ايديه لصاحبه يحرسه ويهديه
بيحضن اسمه بكلامه
وبيساعده ويحمي عينيه
وهات لي زمان ومش مغرور
و كل اصحابي جار مني
ما حد ش فينا بيخالف
وضهر لصاحبه وبيحميه
ولو مقدرتش النوبه
كفايه غربه ياوالدي
وحط جناحك المطحون
وضم السعد وافرح بيه