الفجر قرب و الولد بيشد النعاس
من عينيه و يفلى الجرايد
قبل ما يفرشها و ينام
يكتب ع الهوامش قصايد
قاعد جنب العطار يقرا ف القراطيس
يعطس ..
تطلع من نفوخه حاجات
في مره قال .. أنا نص نبي
الكل حط عليه..
غلبان / ملعون / و اتعبط على كَبَر
ذاع الخبر و العيال زفوه
ركب حمار غلبه بالمقلوب
لبس شوال قصايده
يستر عورات عمره اللي عدى
يزق عِنده لسِتُه لما تقوله..
ذاكر يا ابن الكلب
يرد بحصان خياله الجامح
أنا حافظ دروسي كلها
و يكمل رسمه ع الهوامش
نورس على هيئة أبو العز الحريري
طاير ع الشرق الأوروبي
وش فاطمه _ اللي أطعم م الشيكولاته الكورونا _
داليدا
و محمد منير ..
اللى حول اغانيه بقلمه الرصاص بورتريه
الفجر قرب و الشيخ بيدبدب ع الميكروفون

و الواد بيدق باب دنيته بسن القلم
لساه قلبه فاضي م الغل و الجحود
لساه موجود ..جوه منى و بيغنى