حَلّوا المراكب مع المغرب وفاتوني

عالشطّ واقف بلا مركب وفاتوني

ساعتها قلبي شهق .. يشهد عليه الشفق

بيني وبينك بحور الغربة يا داري

يا ناري يا ناري ماتت في البحور ناري

الطير ده مين هَشُّه؟ على الريح بنى عِشُّه؟

يا عود ريحان أخضر والغربة بتحِشُّه

يا عين يا عين صعبان عليّ يا قلب الورد يا صغيَّر

و الله ده كان بدري تتلوّع و تتحيّر

لفّيت أنا لفّيت في الغربة ما خلّيت

بلد تشيلني وبلد ترميني تاني لبلد

عواف عليكي يا نخلة مضلِّلة على الباب

راخية الضفاير وحاضنة الأهل والأحباب

مِسا التماسي يا ناسي

ماتصدّقوش إنّي ناسي

يا سهرانيين في القمر .. ليل الغريب ظلْمة

يا عيني يا ليلي.. لا قنديل ولا نجمة

مناديل دي ولّا قلوع ؟ وده بحر ولّا دموع؟

خدوني يا راجعين .. فايتينّي ليه ولمين

حَلّوا المراكب مع المغرب وفاتوني

ع الشطّ واقف بلا مركب وفاتوني