محمد عبد القوي حسن

شعر : محمد عبد القوى حسن

الضحكه فارده القلع للنسمه
والبسمه راسمه السحر ع القسمه
نسمايه .. غازله سندسك للدلال
صبحك يفيض بالجمال البكر
من صفا الليل للمسافر
للكوبايات شربات
من عندليب الجنان تطلعى
ولورد اجمل من بساتين الكمال
ضيك مالوش فى الزى
عسلك بيسكر كل اهل الحى
قمرك بيسحرنا بشوق
صبحك يفطرنا بحليب الامنيات
العصر نيل بينشد المواويل
والليل طويل مالوش اخر
قصص الحوريات الابيه
عشش الطيور المستحيه
النظره حضره
والخضره فطره
والعاشقين هايمين
والمنشدين دايخين
وانا اللى واخدانى الجلاله
ف اوسع الميادين
اشهد بانك زين من زين من زين
من بنت بستان العنب والتين
او من فين بيطلع كل هذا السحر
من فين ؟؟؟؟