شعر: أحمد عبد الجواد
ملك بيخطب خطبة وداع الحكم
“شعبى الحبيب
أنا قائد العهد الجديد
أنا الحكيم
وقت استباق الهزيمة بالنبوءة الملهمة
أنا الضمير
وقت انعدام الأمانة والأمان
أنا الدرع والسيف والسلام
أنا الحروب
أنا الإيمان
أنا الصيام
وقت العطش
أنا الخشوع
أنا الركوع
السجود
صلاة الخوف
والرحمة
وشهوة الصمت الكلام
شعبى الكريم
أنا لسه موجود فى النهار
ضل عرشى هو نائب حكمى
هو ضلكم من شمس الغزاة
شعبى العظيم
هاموت على أرضكم
رغم كل الجموع
والندا والليل والصباح
مش ناوى أترك جرحكم
أنا لسه باقى
مش مخلد
لكن هاكون أيضا ملك حضوركم
انتباهكم همسكم
غصبا عن أى ميل
أو اعوجاج عن طريقى
هاترضوا بالأمر الجميل
يهمس وزيره:
كلمتك هى مفتاح النجاة
هى الطريق والأمل
هى الحياة
يبتسم ملك الحضور
لازم نوحد صفنا ضد كل الخارجين
نبتدى عصر الحوار
نختلق سور للقرار
لازم نثبت حكمنا لينا ثم لينا
ثم للمذكور فى شهادة ميلاده
إنه من صلب الملوك
إنه منى
إنه صوت الحق
والدستور والناى
والغنا فى الشرق
والمعاهدة
وتصدير الحياة للغير
والمكاشفة والسلام
هو منى شكل من أشكال الوراثة
شعبى يا صابر على نعيم حكمى
لما احتاج إليك وقت الضرورة
انهزم
واركع
وموت”