الشمس عيونك . وانا كنت بكونك كون ونهار ..

ونهار ماتكونى . تكون ترانيم أشعار ..

دلوقتى قطعت خيوط الضى مابينى وبينك .،

من ساعة القهر ماصار ملكوتك .،

الشمس بكل طاقات الضى . إتحلل كل مافيها ..

الشمس سراب . والعتمة الباب الفاضل .،

الفاصل بينى وبينك ..

إتحلل كل مافيه الباب !

العتمة سحاب وسما وشموس .،

مزروعه ف كل طريقى !

أتمشى يتعرى طريقى !

أطب . أتسند . تغرس إيدى

ف تراب ضحكة عتمة صوتك .،

عتمة صوتك جمرة نار .،

وانا كنت باكونك كون ونهار ..

********

ياللى العناكب واخده شكلك ملمحك

لا سكتك تنفع تكون لى سكتى

ولا كعبتك ح تكون ف يوم لى قبلتى

منتاش ولد . وقتن ما اكون الناس

كون هوّ البلد ..

مع إن وقت ما كان زمانك سيل غضب .،

كان قلبى لعنيك الوطن ..

********

ياللى العناكب واخده شكلك ملمحك

لا ف يوم ح تغفر أو تسامح ،

وقتن ما اكون الغلطة والمغلوط

ولا قلبى فيك لامح خيوط ضىّ البراءة والأمل

مبشوفش فيك غير قلب مبتور الجوارح

أطلال ملامح . محفورة بين خطين قلق

وطريق بدايته المنتهى

ف بقيت بملكك نرجسى

مبسوط بداء العنكبة

يا نرجسى ..

يا نرجسى ف شكل المعانى والأمانى .،

والتوتر والقلق

أنا غلطتى إنى رضيت قلبى يكون جوّه عنيك

فاعل وفعل ومبتدأ

تيّم مشاعرى سلسبيل العشق منك

جرى يمّ نبضى فانطلق

أصبح مصيرنا وخط سيرنا وطوق خلاصنا .،

الإندماج

ف اتوحدت فينا النسب . كل النسب

معايير وجودنا والعصب ..

وانا اللى قلبى كان ف يوم أنهار مشاعر .،

من إرتحال القهر فيها إتفجرت بركان غضب

وحدة مشاعرى إتجزأت ملهاش رجوع ..

ف لا سكتك تنفع تكون لى سكتى

ولا كعبتك ح تكون ف مرّة قبلتى ..