شعر : محمد عزالدين

في العشرينات العشوائية
الطيبة..
أيام ما كان الحلم فارض نفسه
حاكم للطريق
الرغبة والخوف
المسيرة بقلب قاصد يستخبى
في الصديق..
ايام ما كانت لمة القهوة
البسيطة ليها طعم
بنكتشف إحساسنا بيه..
مع ساندويتش
الفقر بيحرجم عليه..
كوباية الشاي الصديقة
في النضال المفتعل
الإفيهات والتريقة
ع الهم والموت والوجع
ع الممنوعات والإرشادات
على خط أحمر
بيحاصرنا في كل شيء..
البحث عن فرصة أمل
تمسح ليالي بتنتزع منا
اللي كنا بنرضا بيه..
أيام ما كان للشمس والليل
ذكريات تسمحلنا
بالرحلة بين الأمكنة
على ضهر فكرة بتتولد
ترفض تكون نسخة لغيرها
أو مجرد تجربة..
أيام ما كان الأمر محسوم
بالمحاولة والطواف
بعلامة استفهام
عيونها بصة بعد الاجوبة..
بتحب تمسك في السما
تعمل خناقة
مع حواديت اللي فاتوا
ترتكب كل الغباوة الممكنة
وتنط فوق ضهر التاريخ
وتعيد كتابة الأزمنة..
تحلف بإن الحب والثورة
حلاوة الانتصار
من حق هذا العصر..
أيام ما كان البحر
هو اسكندرية في الشتا
واسكندرية مش مجرد بحر..
ايام ما كان العمر
مش محسوب عليا
وابتسامتي في الفرح
مش تحت بند الصبر..
أيام ما كانوا صحابي
بيروحوا المظاهرة يهتفوا
أنا…..
كنت بكتب شعر..