لسانى باكتب
____________
علشانك انتى يا نور عينى
شعرى هايحضن دواوينى
وهاقول على اللى حصل فيها
يا ساكنه قلبى وشرايينى
شايف جبالك وبتبكى
ودموع سماكى اللى بتشكى
شفت الكواكب وقفالك
ع اللى جرا فيكى بتحكى
يامصر يا شمس الدنيا
ما تنورى الدنيا بنورك
قمر الليالى على نيلك
يشهد بفضلك وحضورك
ودموع شتاكى ما تنزلشى
والفكر تايه جواكى
شايف كآبه ما وردتشى
مين اللى عكر فى سماكى
والنيل حزين قاعد يبكى
صعبان عليه حاله معاكى
الضلمه زادت يا خساره
وطيور سماكى اهى بتبكى
وأنا اللى بكتب علشانك
كل اللى شفته بعيونى
ولانى كاره سجانك
فى ليله سودا حبسونى
قلت الحقيقه ومكدبتش
فى سجن وحدى وسجنونى
غير العذاب اللى أنا شفته
يا عمرى يا ساكنه عيونى
كرباجهم القاسى وجعنى
على كيف هواهم مشونى
وبا عترف غصب عنى
وبخط ايدى ومضونى
حكايتى باكتبها عشانكم
فما تزعلوش لو دبحونى
وما يحلموش يوم اطاوعهم
أو أرضى يوم ويزلونى
ويقولو خاين باع بلده
وف خانه سودا يحطونى
ع العهد يا مصر يا غاليه
ها فضل محافظ على دينى
وتفضلى جوه ف قلبى
واكتب عشانك دواوينى